Վերջին 85 տարում Սուրբ Սոֆիայի տաճարը կրկին մզկիթի վերածելու քննարկումները պարբերաբար օրակարգ են եկել: Թուրքիայի նախագահ Ռեջեփ Թայիփ Էրդողանը քանիցս շահարկել է այս հարցը Հունաստանի հետ հարաբերությունների լարվածության ֆոնին, հիշատակել իր նախընտրական խոստումներում: Թուրքիայում քաղաքացիների շրջանում անցկացված հարցումները ցույց են տալիս, որ հանրությունը այս հարցում մեծապես աջակցում է նախագահին:
Ուղղափառ քրիստոնեական աշխարհի կարևորագույն կառույցը՝ Սուրբ Սոֆիայի տաճարը առնվազն երկու շաբաթ դեռ թանգարան կմնա: Պետական խորհուրդը `Թուրքիայի բարձրագույն վարչական մարմինը, հայտարարել է, որ վճիռ կկայացնի 15 օրվա ընթացքում, ընդամենը 17 րոպե տևած լսումից հետո: Դա կարող է կրկին մզկիթ դառնալ, եթե դատարանը հաստատի այդ քայլը: Թուրքիայում իսլամիստները վաղուց էին կոչ անում, որ այն վերափոխվի, բայց աշխարհիկ ընդդիմության անդամները դեմ են այդ քայլին:
Այս հարցը հուզում է նաև միջազգային հանրությանը: Նախօրեին ԱՄՆ պետքարտուղար Մայք Փոմփեոն Թուրքիայի իշխանություններին կոչ է արել պահպանել տաճարի թանգարանի կարգավիճակը: Սակայն Թուրքիայի ԱԳ նախարարության խոսնակ Համի Աքսոյը կրկին հիշեցրել է, որ Սուրբ Սոֆիայի տաճարը երկրի տարածքում գտնվող մշակութային բոլոր արժեքների նման Թուրքիայի սեփականությունն է:
Սուրբ Սոֆիայի տաճարը մզկիթի վերածելու Թուրքիայի նախաձեռնությունը դատապարտել են հույն հոգեւորականները: Նրանք նշել են, որ Սուրբ Սոֆիայի տաճարի կարգավիճակի փոփոխությունը դժգոհության մեծ ալիք կառաջացնի ողջ աշխարհի քրիստոնեական համայնքում։ Իսկ Հունաստանի Պելոպոնես թերակղզու Պատրաս քաղաքի եկեղեցիներից մեկում 4 ժամանոց պատարագ է մատուցվել, որպեսզի Սուրբ Սոֆիան չվերածվի մզկիթի։
Նյութի աղբյուրը ՝ www.bbc.com