Հայաստանը մեծապես կարևորում է ԵԱՏՄ-ի համար գազի ընդհանուր շուկայի ձևավորումը, այսօր ասել է վարչապետի պաշտոնակատար Նիկոլ Փաշինյանը՝ Եվրասիական տնտեսական բարձրագույն խորհրդի հերթական նիստի ժամանակ, որն անցկացվել է է տեսակոնֆերանսի ձևաչափով։
Փաշինյանն անհրաժեշտ է համարել, որպեսզի միջազգային պայմանագրի շրջանակում համաձայնեցվեն ոչ միայն Միության ընդհանուր գազի շուկայում գնագոյացման և սակագների ձևավորման մոտեցումները, այլև սահմանվեն երրորդ երկրներից, ներքին սպառման համար, գազի փոխադրման սակագները՝ թափանցիկության և ոչ խտրական մոտեցման հիման վրա։
Ըստ վարչապետի գրասենյակի՝ նա կարևորել է շարունակել աշխատանքը փոխադարձ առևտրում խոչընդոտներն ու սահմանափակումները հայտնաբերելու և վերացնելու ուղղությամբ:
«Համաձայնեցված արտաքին առևտրային քաղաքականություն վարելու համար միասնական մոտեցումների ձևավորումը, որը կհամապատասխանի յուրաքանչյուր անդամ պետության և ողջ Միության շահերին, եվրասիական տնտեսական ինտեգրման ապահովման առանցքային բաղադրիչն է», — ասել է վարչապետի պաշտոնակատարը՝ շարունակելով․ — «Այսօր վստահորեն կարող ենք ասել, որ ԵԱՏՄ-ի և երրորդ երկրների միջև ազատ առևտրի և առևտրատնտեսական համագործակցության մասին համաձայնագրերը ցույց են տվել իրենց պահանջված լինելը: Այս տեսանկյունից հերթական անգամ վերահաստատում ենք մեր պատրաստակամությունը` շարունակելու եվրասիական տնտեսական ինտեգրման գաղափարի հանրահռչակման և դրա միջազգային հեղինակության բարձրացման ուղղությամբ համատեղ ծրագրերի և նպատակաուղղված ու հետևողական աշխատանքի իրականացումը»:
Հայաստանի վարչապետի պաշտոնակատարը կարևորել է նաև Միության և նրա անդամների շահերը միջազգային առևտրում երաշխավորող իրավական դաշտի ստեղծման ուղղությամբ աշխատանքի շարունակումը:
Նիստին մասնակցել են նաև Ռուսաստանի նախագահ Վլադիմիր Պուտինը, Բելառուսի նախագահ Ալեքսանդր Լուկաշենկոն, Ղազախստանի նախագահ Կասիմ-Ժոմարտ Տոկաևը, Ղրղզստանի նախագահ Սադիր Ժապարովը, ԵԱՏՄ-ում որպես դիտորդ Ուզբեկստանի նախագահ Շավքաթ Միրզիյոևը և Կուբայի նախագահ Միգել Մարիո Դիաս-Կանել Բերմուդեսը, ինչպես նաև Եվրասիական տնտեսական հանձնաժողովի կոլեգիայի նախագահ Միխայիլ Մյասնիկովիչը և Եվրասիական տնտեսական բարձրագույն խորհրդի նախագահ Նուրսուլթան Նազարբաևը: