Այսօր ՀՀ տարածքային կառավարման և ենթակառուցվածքների նախարար Սուրեն Պապիկյանը հանդիպել է ՀՀ-ում Գերմանիայի արտակարգ և լիազոր դեսպան Միխայել Բանցհաֆին:
Հանդիպման սկզբում նախարարը կարևորել և բարձր է գնահատել ՀՀ վարչատարածքային բարեփոխումների, համայնքային ծառայությունների մատուցման բարելավման, համայնքային ենթակառուցվածքների զարգացման ու բարեկարգման հարցում Գերմանական զարգացման գործակալությոն և Վերականգնման վարկերի բանկի ունեցած ներդրումը և աջակցությունը:
Նախարարը անրադարձել է նաև Վերականգնման վարկերի բանկի աջակցությամբ հայաստանյան գյուղական բնակավայրերի ջրամատակարարման և ջրահեռացման համակարգերի արդիականացման ծրագրերի վերսկսմանը:
Ինչպես նշում է ՀՀ ՏԿԵ նախարարության պաշտոնական կայքը, «Դեսպան Բանցհաֆը խոսել է բազմաբնակավայր համայնքներում քաղաքացիների սպասարկման գրասենյակների հիմնման, ինչպես նաև ջրային և էներգետիկ ենթակառուցվածքների բարելավման ուղղությամբ համատեղ իրականացվող ծրագրերի կարևորությունից և վերահաստատել գերմանական կողմի պատրաստակամությունը աջակցելու ՀՀ կառավարությանը դրանց իրագործման հարցում: Դեսպանի խոսքով Հայաստանի և Գերմանիայի կառավարությունների միջև առկա սերտ համագործակցությունը դրսևորվում է հատկապես այն ոլորտներում, որոնք ղեկավարվում և համակարգվում են Տարածքային կառավարման և ենթակառուցվածքների նախարարության կողմից»:
Կողմերը անրադարձել են նաև գերմանական կողմի աջակցությամբ իրականացվող Հայաստան-Վրաստան բարձրավոլտ էլեկտրահաղորդման գծի կառուցման ծրագրերի ընթացքին, ինչպես նաև վերոնշյալ ծրագրերի կայուն շարունակականության ապահովմանը:
Լուսանկարները՝ stad.am
Նյութի աղբյուրը՝ stad.am