Առողջապահության նախարարի պաշտոնակատար Անահիտ Ավանեսյանն ընդունել է Հայաստանում Բելառուսի արտակարգ և լիազոր դեսպան Ալեքսանդր Կոնյուկին և գլխավոր խորհրդական Վյաչեսլավ Լիսուխային:
Ողջունելով հյուրերինԱնահիտ Ավանեսյանը կարևորել է Հայաստանի և Բելառուսի միջև առողջապահության բնագավառում բնականոն համագործակցությունը, հատկապես Հայաստանում օրգանների փոխպատվաստման ծառայության զարգացման ուղղությամբ։
«Մեր երկու երկրների միջև սերտ համագործակցությունը շարունակվում է: 2019 թվականին Մինսկում հանդիպել եմ Բելառուսի Հանրապետության առողջապահության նախարարի հետ, քննարկել Հայաստանում օրգանների փոխպատվաստման ծառայության ներդրման վերաբերյալ հարցեր և գործակցության ամրապնդմանն ուղղված մի շարք հեռանկարային թեմաներ: Սակայն COVID-19-ի համավարակն ու պատերազմը որոշակիորեն խոչընդոտ հանդիսացան մեր առաջիկա անելիքներին: Այնուամենայնիվ, հույս ունեմ, որ համատեղ ծրագրերը կյանքի կկոչենք, ու երկուստեք կաշխատենք այդ ուղղությամբ»,-ասել է Անահիտ Ավանեսյանը:
Կողմերն անդրադարձել են գիտակրթական, դեղորայքային քաղաքականության ոլորտներում, կորոնավիրուսային հիվանդության կանխարգելման և բուժման ուղղությամբ համագործակցությանը:
Կողմերը պատրաստակամություն են հայտնել նշված և այլ ոլորտներում ընդլայնել համատեղ անելիքները: