ՌԴ ՊՆ ականազերծման միջազգային կենտրոնի մասնագետները շարունակում են Արցախի տարածքի ականազերծման աշխատանքները: Այս մասին հայտնում է ՌԴ պաշտպանության նախարարությունը:
Օրվա ընթացքում ռուս սակրավորները մաքրել են 6.5 հա տարածք, հայտնաբերել և ոչնչացրել են 787 պայթյունավտանգ առարկա:
2020-ի նոյեմբերի 23-ից ի վեր, ականազերծման ընթացքում Ռուսաստանի խաղաղապահ ուժերի ինժեներական ստորաբաժանումները չպայթած զինամթերքից մաքրել են մոտ 446.4 հա, մոտ 165 կմ ճանապարհ, 618 բնակելի շենքեր, այդ թվում՝ 22 սոցիալական նշանակության օբյեկտներ և վնասազերծվել է 22.542 պայթյունավտանգ առարկա:
Արցախում պայթյունավտանգ առարկաներից տարածքն ականազերծելու ընթացքում ռուս խաղաղապահներն օգտագործում են ժամանակակից ռոբոտատեխնիկական համալիրներ, որոնք թույլ են տալիս պահպանել ականազերծման բարձր տեմպը լեռնային տեղանքներում և եղանակային վատ պայմաններում:
Հայտնաբերված պայթյունավտանգ առարկաները և չպայթած զինամթերքը դուրս են բերվում և ոչնչացվում են հատուկ սարքավորված զինափորձարանում: Այն զինամթերքը, որը հնարավոր չէ տարհանել, ոչնչացվում է տեղում անվտանգության բոլոր անհրաժեշտ միջոցների կիրառման պայմաններում:
Աղբյուր՝ 1lurer.am